洗 衣 機 改 位 要 好 小 心

好耐冇寫blog因為最近太多嘢做！大部份order都係熱水爐漏水，外牆漏水同埋樓上有水漏落樓下之類。

有個居屋業主打電話嚟話，佢露台盞燈個位不停有水流出嚟，燈座燒咗，於是佢擺咗個膠杯上去，發現每日竟然流咗幾杯水！佢去管理處投訴，又上去揾樓上業主投訴；管理處要求食環署check漏水，結果係冇漏水！所以希望我哋可以幫吓佢揾漏水原因。

我問佢咁嘅情況出現咗幾耐，佢話大約四年！佢竟然可以忍受四年咁耐？經管理處安排，樓上業主願意俾我哋喺佢屋企進行微波測試檢查。檢測結果發現，除咗廁所企缸花灑幅牆有D問題外，最大問題係個洗衣機，滲漏情況極為嚴重！事後揾咗個單位嘅平面圖做對比，證實部洗衣機真係改咗位。

當業主將部洗衣機改位嘅時侯，如果水喉或者去水喉接駁做得唔好，都好大機會會造成漏水，後果可大可小！

喺呢度再次提醒大家，無論水喉又好，去水喉又好，逢係移位或者改装，再好揾D合資格嘅水喉師傅嚟做，千祈唔好貪平隨便揾個泥水師傅又或者嘗試自己做，諗住好簡單，因為如果做得唔好嘅話，後果可能好大鑊！

懷 疑 暗 喉 漏 水

今朝有個blog友打電話嚟，把聲好緊張咁話“我客廳同廁所中間嘅牆身有水漬，唔知點算？”。我叫佢鎮定D，問佢水漬嘅位置高定低，佢話離地面大約三呎。我話咁嘅情況通常應該睇吓牆身後面有D乜嘢：-

1. 如果後面係浴缸，可能浴缸邊牆身滲水，或者浴缸去水孔有滲漏；

2. 如果後面係企缸，可能牆身內花灑水喉漏水，或者企缸牆身防水做得唔好；

3. 如果後面係洗水盤，可能水喉漏水，或者洗水盤去水位滲漏；

4. 如果後面裝咗熱水爐，牆身內水喉漏水。

點解牆身內水喉會漏水？原因係而家裝飾要美觀，多數冷熱水喉都係藏喺牆身裡面，用嘅都係幼銅喉，我哋又經常用熱水沖涼，如果一家四口每人每晚沖一次涼，加上冷天朝早洗面都用熱水。條熱水銅喉每日係咁開開閂閂，駁口位置長時間不斷冷縮熱脹，就會做成漏水。

如果係浴缸去水口或者洗水盤去水位漏水，D水會沿廁所地台滲入牆腳，出現水氣上升現象，今牆身出現水漬。

我叫佢試吓係咪水喉漏水，做法其實好簡單，首先抄低水錶個讀數，然後將屋企所有水喉閂緊；大約一小時後再去睇吓個水錶，如果水錶讀數變大咗，即係話有水喉漏水；如果冇變動，就有可能係去水位出事；如果有企缸，可能牆身防水有問題。

應該揾專業人士檢查然後維修，就可以安心啦！

雷 暴 警 告

呢幾日雖然大部份都係天氣晴朗，氣溫都成三十幾度，但間中都有驟雨，甚至大雷雨；天文台都發過幾次雷暴警告。

正如我前文講過，每次大雨過後，都一定有好多讀者打電話嚟我公司，嗌哂救命咁問，“我屋企漏水，點算？”“我個窗台漏水，點算？”“我間房天花漏水，點算？” . . . 等等等等！

我叫佢哋唔使咁緊張，睇翻我前幾段博客先，睇吓有冇類似情况，再自己檢查清楚，肯定真係揾唔到原因，再揾我哋幫手都未遲！

露 台 漏 水

朱仔今因下晝打電話俾我，話佢個friend屋企個露台漏水，懷疑樓上漏水，問我應該點做？

我同佢講，要睇佢個friend想點，如果佢樓上個業主承認可能係佢個露台漏水，我可以幫佢做《微波掃描》檢測，睇下邊度漏水，再揾專業防水公司做維修，咁就可以解決個問題。但首先一定要講清楚D費用邊個負責，無謂做完之後有爭抝！

又如果樓上唔瞅唔睬，十問九唔應，咁就要揾管理處同樓上聯絡，話你要揾人嚟檢查漏水，如果證實係佢個露台漏水嘅話；咁全部費用包括漏水檢測同埋維修費用，都要佢負責。

如果樓上都重係唔理，咁就要揾「專業人士」根據漏水檢測寫份報告，再揾律師出封律師信俾估佢。嚟到咁嘅地步應該可以解決到，如果唔係真係要法庭見喇

其實大家樓上樓下，街坊街里，應該都唔使搞到咁僵嘅！唔啱傾到啱囉！

進 一 步 求 證

今日做咗一個幾特別嘅order,事緣某區有一個豪宅，早前做咗外牆防漏工程冇幾耐又漏返水；管理處梗係揾防水公司跟進啦，翻執後過咗一排冇事以為搞惦。點知打完風又出事！管理處曾經揾過一D公司做漏水檢查，叫防水公司再翻執。

佢哋啊頭到現場天台睇過，發現有積水，懷疑可能有水滲入外牆做成漏水，就落order俾我哋做《微波掃描》檢測，睇吓D水係咪真係由天台滲入外牆；就咁睇真係有機會，但係做完天花測試之後，發現天台的確有滲水，但外牆漏水同天台積水就完全冇關係，因為天花漏水位置同外牆漏水位置嘅距離太遠，兼且水分流向唔吻合。

其實上述嘅爭抝情况可以避免，以下兩個方法都可以用；

1 - 防水工程施工前先做《微波掃描》檢測，得出測試報告後，作針對性維修。

2 - 防水工程完成後進行《微波掃描》檢測，測試報告可以顯示維修範圍內重有冇漏水。

以上兩個做法都可以避免工程完成後再有問題出現！

個人的人身安全

相信大家一定知道早幾日喺一個地盤槽發生嘅六死嚴重工業意外！喺依度亦提醒各位讀者，好多時會自己嘗試去check吓滲漏水，但係一定要做好安全措施！特別係喺天台，窗台同埋外牆高位嘅地方，自己對自身安全冇信心，就千祈唔好監硬嚟！

請有資格嘅人士檢查唔一定好貴，其實價錢主要視乎工程大小嚟決定，而家一般D有信譽嘅防水公司都唔會亂嚟，但係自身嘅安全就絕對有做證！

切記！ 切記！

颱 風 下 天 花 勁 漏 水

天文台喺尋日下晝差唔多六點掛8號風球，成晚橫風橫雨，一直掛到今朝十點幾先落返3號波。

可能D讀者以為我今日唔使開工，一落波就接咗差唔多十個電話，全部都係話天台漏水，天花漏水，窗框漏水，窗台滲水 . . . . 等等 . . . 等等！

佢哋個個都話平時落兩都冇事，唔知點解今次落雨會搞成咁？其實喺打風先漏水主要原因有以下幾點：

天台平時唔漏同為冇打風咁大雨，雖然已經有裂痕存在，但D雨冇打風時咁大撞擊力，加上天台去水位俾垃圾塞住晒，形成水浸所以借勢造成漏水。

天花漏水可以參考天台漏水嘅原因；另外亦有可能D水係由外牆滲入嚟，因為打風時，D雨水會借住D風力狂打牆身，如果牆身有裂痕就會造成滲漏。要視乎天花漏水位置同外牆嘅距離嚟決定。

至於窗框同窗台嘅滲漏水，就真係要小心檢查，係鐵窗定鋁窗，係唔係D窗邊做得唔好，最近有冇做過窗門維修 . . . 等等 . . . 等等。

其實打風加特大雨勢嘅時候出現滲漏水情況，唔使太驚慌嘅，正如上述情況，都可以預防嘅，平時多D留意，一定注意到邊D地方可能會漏水，立即揾專業防水公司幫手；就算真係揾唔到原因，都可以利用先進科技揾出嚟嘅。

洗 衣 機 水 喉 漏 水

好多人買咗新屋入伙前喺單位裝修嘅時候，為咗美觀或者方便操作問題，都會將洗衣機水喉移位。 就算唔係新屋入伙，單位住得耐咗都會裝修吓，亦有可能移吓D水喉位，經常有人將洗衣機移位。

大家千萬要留意移水喉位嘅時候，水喉位移好後，要即場要求水喉師傅試吓放水，做多幾次開制閂制動作，睇清楚條水喉嘅接駁位有冇滲漏，個水制扭起嚟有冇唔順暢；肯定完全冇問題先好封牆鋪磁磚。

因為最近我做咗一單滲漏水檢測，就正正係冇喺洗衣機移喉後試清楚，入伙冇耐發現牆身有水漬，揾我檢測後至知大件事！

所以喺依度提醒吓大家囉！千祈唔可以疏忽架！

大家可以睇吓附圖。

Sharing

Press Release: How to Solve Water Leaking Problems ?

天 花 漏 水 點 算？

早兩日有朋友打電話問我，話近排發現天花漏水，又話最近樓上曾經裝修，有冇關係呢？大家不防睇吓以下文章；希望可以幫到啦。

《上層裝修 天花漏水如何追討？》

若果因上層單位裝修後而令到下層單位天花有漏水，下層單位和上層單位業主談及應是兩層中間的水管漏水所引致。但上層業主不理會，下層業主可以用甚麼方法解決或如何追討？

首先下層業主可以到大廈管理處，將其單位出現的問題告知大廈管理處的職員，如有需要可以安排管理員或管理處指派的維修工作人員到單位視察及檢查所出現的問題。視察及檢查目的在於確定漏水的問題是因誰而引致。

為了避免日後爭坳，在進行視察及檢查前，有關方面(即下層單位業主、上層單位業主及管理處)最好能達成協議，若証實漏水問題是誰所引致，便要負責所有維修費用。假若經維修人員檢查過証實是因上層單位裝修後所引致，下層業主是可以向樓上單位的業主要求賠償。若遇困難可要求管理處協助商討解決辦法，畢竟為鄰居，能和平解決當然最好。如果上層業主真的不願意作出任何補償，閣下可能需採取法律行動向該業主追討。

轉載 美聯物業 2008年1月30日 文章

檢 查 漏 水 點 解 唔 用 紅 外 線？

有朋友睇咗我個Blog 有關我幫朱仔屋企Check 漏水時係用“微波掃描”，佢問我點解唔係用紅外線？因為喺坊間見到D 廣告一般都話係用紅外線嚟Check 嘅，而微波佢就話好少聽到。

冇錯，喺坊間一般D廣告或者一般人都以為Check漏水一定係用紅外線，而“微波掃描”喺香港都係出現咗三年左右，其實呢個技術喺歐美已經流行咗差唔多20年。等如我哋以前未有“磁力共振”嘅時候，無論時照肺或者照腦都係用X-光一樣；科技係不斷進步架嘛！

簡單D咁講，紅外線嘅功能係找尋熱量，測試嘅時候，主要係分辯接受檢測物件表面嘅溫差；假如要檢測牆身有冇漏水，就要近距離向牆身影張紅外線相，利用紅外線分析牆身表面同裡面温度嘅差異，通常高温代表乾，低温代表濕，而決定有冇漏水。但係好似近日咁，日日氣温都成三十幾度，如果裡面真係有水，牆身內外嘅温度差唔多，咁就會好難分辯得清楚究竟有冇水分，另外，紅外線可以偵測到牆身嘅深度亦非常淺，係有限制，亦都係一個障礙。紅外線用得最多同最有效嘅地方就係喺機電方面，好似電制房，如果懷疑D總制呀，或者繼電器(灰士)有冇超荷(Overload)，影一張紅外線相，就清清楚楚睇見邊條灰士嘅温度唔正常。所以點解邊境口岸都係用紅外線相機嚟分辦邊D人發燒嘞，總係有佢嘅作用嘅。

“微波掃描”嘅功能係找尋水分子，檢測方式，係手提儀器連同一個微波探頭同時操作，探頭有70mm 同110mm 兩種偵測深度，視乎檢測唔同嘅物質及厚度而決定用邊一欵。操作時好似醫生個聽筒咁要“惦”住表面(touching test)，如果係Check 牆身，探頭會放射微波深入牆身70mm深掃描，當微波偵測到有水分，會今水分子產生“介電效應” (Dielectric Effect)，產生振動頻率，水分越多，產生嘅振動頻率越高；冇水分就冇反應；手提“微波掃描”儀器將偵測所得嘅數據，再利用生產商提供嘅軟件繪製《水分分佈圖表》，就可以清楚瞭解滲漏水源頭及水分伸延及擴散情況。

相信可以俾到大家有一個比較清楚D嘅“微波掃描”概念。

滲 、 漏 水 測 試 儀 器

果日同朱仔屋企揾完漏水位置之後，佢對我用嘅儀器都幾好奇，不防俾大家睇吓；




















部機叫做MOIST-200，係德國製嘅，其實部機差唔多好似部迷你PC咁，用嘅時候要連埋個探頭一齊操作；探頭有兩欵，可以將微波射入牆身70mm 或者110mm，視乎需要而用邊一欵。

至於部機嘅詳細功能，大家有興趣知嘅話，以後再講啦！

朱 仔 屋 企 邊 度 漏 水 ？

早兩日終於去咗朱仔屋企幫佢檢查吓點樣漏水法？

佢道先帶我去佢樓下個單位度，了解吓漏水情况。 當入到浴室時，嚇咗一跳！一大一細兩個塑膠盆放咗喺洗手盆上面，不停有水滴落嚟；

















咢高頭望吓，假天花揻開咗，大部份批盪剝落哂，好似水瓜棚咁！
















業主乜生苦瓜乾嘅表情，佢好慘咁同朱仔話：“朱仔哥，大家成廿年街坊，幫幫手快D揾人搞惦佢啦！唔使我同屋企人去廁所都要擔遮吖！”

朱仔聽完即刻講咗聲“Sorry！”就嗱嗱林拉我上佢屋企，我馬上喺佢個浴室做測試，最後發現咗漏水嘅罪魁禍首原來係佢個坐廁！
















叫佢快D揾水喉師傅整番好個廁所水入水制就可以平安無事喇！

漏水真係可大可小，好彩佢樓下個業主咁friend,如果唔係，朱仔俾人告都有份！

如果大家有漏水煩惱，可以E貓俾我，睇吓幫唔幫到手。

究 竟 應 該 點 樣 check 漏 水？

依幾日真係太多order,攪到冇哂辦法幫朱仔喺佢屋企check漏水，佢雖然話唔緊要，但始終過意唔去，再講多一次sorry！

亦都有其他老友想知道吓我做緊嘅“微波掃描”滲漏水測試究竟係點樣運作嘅，而家介紹俾大家，可以瀏覽吓我哋公司個網頁睇吓，就會瞭解乜嘢係“微波掃描”架啦！

http://www.waterleaking.com

唉 . . . 甩 底！

要同朱仔“沙霖”講聲sorry，因為今日幫唔到佢check漏水，實在太多客嗌救命要check漏水！

唯有叫朱仔等多陣。

俾 樓 下 投 訴 漏 水 ！

近排天雨頻密，明明陽光普照都可以無端端整場大雨你嘆吓，夜晚重話有雷暴同黄雨警告添！

老友朱仔打電話嚟話早排俾樓下個業主投訴佢沖涼房漏水，整到人哋個天花好似發瘋咁一撻撻。朱仔話已經好醒，打電話去食環署要求協助揾吓佢屋企邊度出事。

上星期，食環署派人嚟到喺朱仔屋企個沖涼房同廚房睇吓D去水渠有冇塞，然後用英泥塞住兩個去水口，再用水開D色粉倒落地台，浸咗大約半粒鐘，後落樓下用熒光燈照吓照吓，check吓有冇染咗色嘅水流落天花度，佢話冇發現。食環署亞sir話沖涼房同廚房嘅去水渠都冇漏水，懷疑水喉漏，佢哋會通知水務署再嚟check吓D水喉喎！

朱仔話前兩日終於有水務署嘅人出現，即刻叫佢閂晒廚房同廁所嘅水喉，然後check吓個水錶有冇郁，跟住就話冇漏水，然後收隊走人！朱仔都噢哂咀！真係咁就知冇事？

尋日朱仔去樓下同個業主，理直氣壯咁話食環署同水務署都嚟佢屋企check過，完全冇發現漏水！

但係個業主同佢話佢個天花仍然漏緊水，朱仔走入去冲凉房真係見到有水滴緊出嚟！問我點算好？

我同佢講佢屋企好有可能係有暗喉或者其他地方出咗事，佢話大家咁friend點都要救吓佢！

下次同大家講吓喺朱仔屋企點樣幫佢check，同埋揾到邊度漏水啦！

係 咪 一 定 要 揾 師 傅 check 漏 水？

今日下晝同幾個朋友飲下午茶，佢哋知我係專幫D客做check漏水嘅，就問我係唔係一定要揾我哋用部專係check漏水嘅儀器先揾到漏水架咁。

我話其實有D時候自己都可以做，好似落雨天咁吖，正正就係自己檢查間屋有冇滲漏水情況嘅至佳時機。大家只要集中五個檢查重點、細心觀察，就可以知道住緊間屋係乜情況。

1- 要睇吓D窗框、窗台，檢查吓油漆有無出現剝落或者有無水泡，如果有，即係表示可能滲水或含有水氣漏 水機會都幾大。

2- 檢查牆身或者天花嘅乳膠漆，睇吓D顏色有無出現明顯變化、有冇水印，如果有，表示D水可能已經靜雞雞入咗去喇！

3- 摸吓天花係咪凹凹凸凸咁、睇吓有無水漬或者乳膠漆剝落狀況。

4- 仔細喺外面觀察外牆，睇吓牆身有無發霉情況，因為有90%的滲漏水案例，係經由磁磚或者紙皮石裂縫滲入，千祈咪忽視呀。

5- 除咗用對眼睇，亦可以用手摸吓有懷疑嘅地方，感覺吓究竟係乾定濕。

當然啦，漏水都有好多原因架馬,好似樓上漏水,外牆漏水,天台漏水，窗框漏水，窗台漏水，暗喉漏水, 坐廁漏水,熱水爐漏水，水龍頭漏水，花灑漏水 . . . 等等等等；用肉眼未必睇得出，用手又摸唔到，咁咪一定要盡快揾專業人士幫手檢查，如果唔係，到真係落大雨或者打風，就會造成更大嘅破壞架喇。

心 急 人 !

尋日有位小姐打電話嚟，語氣相當急，佢話啱啱落咗細訂準備買個單位，點知入到單位睇吓，先發現牆身有些少泡泡，懷疑奉牆滲水。

佢問我可唔可以即刻幫佢check吓，我話依幾日咁好天，日日三十幾度，無乜可能昃得到有無水，橫惦天文台都講咗下個禮拜會落雨，不如落咗雨先check啦。佢話怕等唔切，因為就到期交大訂喎。唉，真係無辦法。